TOKONY HIFANDAMINA IZAY HIFANINANA AMIN'Ing. RATSIRAKA
Fanjakana mafy hidy sy vaky balle no eto amintsika ankehitriny
(hoy Germain RAKOTONIRAINY)
_____________________________________________________________
Tsy nandrenesam-peo intsony izy teo ho eo fa toa sahala amin'ny nipirina
tanteraka. Nipetrapetraka tokoa izy hatramin'ny 1998 no mankaty fa tsy niditra
an-tsehatra tamin'ny hetsika mivantana intsony, kanefa dia mbola mitoetra ho
mpanao pôlitika tanteraka na izany aza. Ing. Geramin Rakotonirainy io.
Ankehitriny dia nipoitra indray izy ka maneho ny fahitany ny fanjakana sy ny
fomba fiadiny ary izay tokony hataon'ny mpanohitra eo anatrehan'izany. "Famakafakana
pôlitika tsy laroim-pirehana amin'ny maha-mpandinika pôlitika ny tenako no
atolotro", hoy izy, ary amin'ny saina tony tanteraka no nanaovana izany.
Koa amin'ny fahitany azy àry, dia fanjakana mafy hidy tokoa no eto amintsika
amin'izao fotoana izao ka toy ny hoe jadona ny ahitan'ny ety ivelany tsy mba
tafiditra ao aminy azy. Tsy dia izay loatra anefa fa mahita maminy tokoa aza
izay ao anatiny fa "vaky balle" no ao, hoy izy, ka samy mifandrombaka
izay mahasoa azy - teny fampiasan'ny mpivarotra friperie io nindraminy natao
sarisary fanoharana io.
"Mihaja loatra ny hoe tantely afa-drakotra, fa io no tena mahalaza azy",
hoy izy
FIFANOLANANA ANATINY.
"Mihidy an-trano ary tsara hidin-trano ny fanjakana". Tsy vao Ing.
Germain Rakotonirainy no niteny toy izany, kanefa amin'ny fomba hafa noho izay
faheno hatramin'izao no anehoany azy. Tsy trano iray fotsiny no mafy hidy toy
izany, hoy izy, fa tanàna iray manontolo mihitsy ka ny Filoha Ratsiraka irery
no manana ny lakileny. Ary izay rehetra atao eto dia fanidiana trano avokoa.
Ny faritany mizaka tena, ny Antenimieran-doholona, ny Antenimieram-pirenena, ny
Kaominina, ny televiziona sy ny radiom-pirenena, ny Fitsarana, ny Fitsarana avo
momba ny lalàm-panorenana, ets... gadranà "vachette" avokoa ireny".
Araka izany, hoy izy, raha hanongam-panjakana dia tsy maintsy mamaha an'ireny
rehetra ireny. Sarotra izany ny hidirana amin'izay làlana izay. Indrindra fa
samy vonona ny hiaro ny tanàna sy ny tranony avokoa izay rehetra ao anatiny fa
tsy mahafoy ny tombontsoa azony ao. Samy mifandrombaka amin'ny "vaky
balle", hoy ity mpitarika ao amin'ny MFM ity, ary samy mitondra mody. Ary
dia notsahiviny moa ny tenin'ny minisitra iray ao amin'ny fitondrana ankehitriny
manao hoe : "Tsy fotoanan'ny tolona intsony izao fa fotoanan'ny famenoana
kitapo".
Fa ankoatra izany, dia asehon'Ing. Germain Rakotonirainy koa ny fomba fiadin'ny
fanjakana. Hatramin'izay ka hatramin'izao. Ny antony izao, hoy izy, dia ny
fampidirana fifanolanana sy fifandirana eo amin'ny samy vahoaka "mba
hahavariana ny olona amin'ny adin'akoholahy". Tsy tongatonga ho azy, hoy
izy, ny fipoiran'ny resaka fampifandrafesana ny andevo sy ny andriana amin'izao
fotoana izao, fa "fandemena an'Antananarivo ireny". Efa paika nataon'i
Mao Tse Toung sy i Kim Il Sung izany fametrahana "fifanolanana
anatiny izany". Dia ao koa, hoy ihany Germain Rakotonirainy, ny fandefasana
tsaho toy ny hoe vehivavy mangarom-bava ankizy mahoraka be ankehitriny ity.
TOKONY HIFANDAMINA
Tonga ity ny fifidianana izay ho filoham-pirenena. Ahoana ny tokony ho
fihetsik'izay hifaninana amin'Ing. Ratsiraka ? Nambaran'Ing. Germain
Rakotonirainy fa fahadisoam-paika ("faute stratégique") ny misaina
fihodinana faharoa. "Ny handresena eo amin'ny fihodinana voalohany no
tokony hiomanana avy hatrany", hoy izy. "Mety ho vita izany tahaka ny
nahatafita an'Idriss Derby tany Tchad!". Koa, araka ny heviny, mba hahatanteraka
an'izany, dia tokony hifandamina ireo izay hifaninana amin'Ing. Ratsiraka,
ohatra hoe tokony hijanona ny iray amin-dRatsirahonana sy Ravalomanana fa
mifamono vato, na i Zafy Albert sy Rajakoba Daniel izay samy avy any avaratra,
dia toy izany hatrany amin'ny faritany rehetra. Ny mety, hoy izy, dia olona telo
ihany no miditra ka ny iray "challenger" (izay hoe izay tena azo
heverina ho lany) ary ny roa "outsider" mpandoto rano fotsiny - nefa
mety ho tafiditra ihany koa.
Tsy vitan'izay fa tokony hasiana fiheverana manokana koa ny amin'ny hala-bato,
hoy ihany ity mpitarika ao amin'ny MFM ity. Tsy ao amin'ny biraom-pifidianana
loatra no tena itrangan'izany, fa eny an-dalana miala avy ao ka hatrany amin'ny
HCC. Amin'izany no mety hisianan'ny fiovan'ny "procès verbal" na ny
fitanana an-tsoratra, ka mampitsimbadika tanteraka ny vokatra. Ary dia
notsahiviny moa fa raha ny marina dia i Manandafy no tokony ho lany tamin'ny
1989 saingy...
Koa eo amin'izany lafiny izany indrindra, hoy izy, no tokony hanompanana ezaka
betsaka. Mety ho azo iadian-kevitra angamba izany voalazany izany nefa misy ho
eritreretina.
(Rafidy)
Lahatsoratra nivoaka an-gazety ny 20 Aogositra 2001, tao amin'ny gazety "Gazetiko".
___________________________________________________________________________