Totohondry mivonkona ho fiantsina

Handroda-tsaranga sy tsy fitoviana

Ts’isy taranaka hoe voa ozona

Ho tengenina lava ho tengenam-bozona

Ny adin’ny asa sy renivola

Tsy efan’ny resaka sy ny angola

Fifanoherana tsy miray

Tsy vitan’ny ravin’ny bemiray

Isika rehetra efa mahatsapa

Fa anjaran’ny asa no miakadaka

Rano eny an’ony misasasasa

Andeha hirongatra isika mpiasa é ! !

Ny fitaovana ho entina ho famokarana

Tsy olona vitsy no hitava-hiarana

Tsy misy tomavoka vangavanga

Fa isika rehetra iray saranga é ! !

Izao fanjakan’ireo olom-bitsy

Masiaka sy vinitra tsy mitsitsy

Matahotra mafy ny ho resin-tsika

Ka é miotakotaka rà mandriaka

Matoa ny madinika miombo-kery

Feno havonona tsy miery

(Mivonona ! !.) handrombaka fanjakana

Eo an-tanan’ny Vola efa mihanahana

Tsy ny vola no haninona é !

Fa ny miasa no tompon’ny vokatra hoy aho

Fa iza no miasa é ! !

Ny Madinika io RABE, Ny Madinika io é ! ! !

Totohondry mivonkona ho fiantsina

Handroda-tsaranga sy tsy fitoviana

Ts’isy taranaka hoe voa ozona

Ho tengenina lava ho tengenam-bozona. Ry namako ô ! !