Merina - Tanindrana:Tetiky ny mpanjanatany
Izay mivolana koa anefa ankehitriny dia samy raiki-tahotra ny amin’ny maha “filalaovana afo” azy io. Ahoana tokoa moa izany hoe « milalao afo » izany ? Ny olona milalao afo dia matetika main’izay afo lalaoviny izay na ipitihan’ny kilalaon’afo indraindray. Ny maivana indrindra amin’ny loza mety hateraky ny afo izay fipitihan’ny kilalaon’afo izay.Tokony samy handini-tena ny olom-pirenena tsirairay avy amin’izany, satria tsy hisy hahazo tombontsoa amin’io fifandrafiana amin’ny maha-Tanindrana sy maha-Merina io na iza na iza. Tsy azo tohaina intsony koa ny fivoaran’ny toetr’andro izay efa mampifamatotra ny samy malagasy amin’ny lafiny rehetra.
Mahavariana anefa, fa dia mbola misy ny sahy mandrangitra azy
io amin’izao fotoana. Aoka hovantanina aloha fa mbola marin-doatra hatramin’izao
ny fahendrena Malagasy hoe “ny vy tsy mikitrana irery”. Iza àry izao no sahy
hilaza fa ho tompon’antok’io resaka fanomezam-bahana ny fiventesana fiaviana na
foko io amin’izao fotoana ? Ny milaza ve hoe “tsy hanaiky handevozin’ny Merina
intsony izahay fa efa niaritra an’izany hatry ny ela ny razambenay taloha”, sa
ny manambara hoe “mandehana ianareo any amin’ny faritra misy anareo any fa aza
manakorontana ny fiainanay eto Antananarivo” ? Azo tanisaina sy tohizana araka
ny zavatra iainan’ny tsirairay andavanandro any ny resaka rehetra manodidina
an’izany.
Ny manam-panahy rehetra dia samy hilaza fa “samy mandrangitra ny
fifahasamihafana ara-piaviana ireo”, ary mety hisy akony hafa amin’ny andaniny
na ny ankilany avy koa. Ingahy Manandafy Rakotonirina, Filoha nasionalin’ny Mfm,
ohatra izao, omaly dia nilaza tao amin’ny
fahitalavi-pirenena fa “ny mpanam-bola vahiny te hifehy ny harena azo
trandrahina eto Madagasikara no miezaka mitady ny fomba hifehezany ny mpanao
pôlitika eto, ary mety ho tonga hatramin’ny fanomezana fitaovam-piadiana
an’ireny mpanao pôlitika ireny mba hifamonoana eto izany”. Tsy nanavaka i
Manandafy tamin’io na mpanao pôlitika eo amin’ny fitondrana na ny mpanao
pôlitika mpanohitra, na koa ivelan’ny fitondrana.
Izany ange no tetiky ny mpanjanatany hatrizay teto ê ! Ny hifandrafian’ny samy
Malagasy no tarigetrany mba hambaboana ny harena teto hatrizay, ka dia io
maha-merina sy maha-tanindrana io no narangaranga. Tsy niova io hatrizay ka
hatramin’izao.Ny mahavariana dia tsy misy tompon’andraiki-panjakana sahy mijoro
miezaka manelanelana sy mandravona ary mampiray ny samy Malagasy
hatramin’izao.Moa ve tsy tafiditra ao anatin’ny zaraasan’ny fitondrana amin’ny
fikatsahana ny hanjakan’ny filaminam-piaraha-monina (ordre public) ny ezaka
takian’ny tsy hisian’izany resaka maloto izany ? Toa manamarina koa anefa izay
fa samy mandrangitra azy io na ny eo amin’ny fitondrana na ny tsy eo. Fitaovana
ikatsaham-pahefam-panjakana sy iarovana an’izay fahefam-panjakana izay ange
izany ny filalaovana an’io resa-poko io ê!Ny tsy azo hamaivanina izany dia
tsotra: eo ny fihetseham-pon’ny olona sasany amin’ny fahasarotam-piaro amin’ny
momba azy ; fa ny tena olana sy mampihoron-koditra ao anatin’izay, dia ny
fahatsapan’ny vahiny te hanjakazaka eto an’izay fahalemena miendrika
fihetseham-po izay, ka zary manamora ny fampidirana an’izay fandranitana
hamoa-doza izay.
Ecrit par Ralay
gdi 29-12-2005