MFM Ivon’Imerina
Roa loha ny dinika nihaonan’ny Mpiandraikitra MFM eto amin’ny Faritra
Ivon’Imerina ny sabotsy 28 febroary maraina tao amin’ny FALDA Antananimena.
- Ny fomba itondran’ny Governemanta ny toe-draharaham-pirenena ;
- Ny fandaminana ara-penitra ny ambaratongan’ny MFM anatin’ny Faritra.
Olivier Rakotovazaha, Mpandraharaha ny fitantanana ny MFM, Rapelanoro-Rabenja
Aimé Mpiandraikitra fifandraisana ivelany ary Jean Constant Raveloson
Mpiandraikitra ny Faritra Ivon’Imerina no niara-nanentana ny adihevitra.
Dila ela ny mitaotao vovonana vao nisaraka ny Mpiara-midinika.
Mikasika ny fomba
itondran’ny governemanta
ny toe-draharaham-pirenena
Ny raharaham-pirenena ankapobeny sy ny raharahan’i Fianarantsoa no nifantohana.
Manamafy ny MFM Ivon’Imerina fa fifandaminana sy fitonian’ny mpiray firenena
no ilaina handrosoana. Mandainga sy mamahan-dalitra ny vahoaka ny Mpitondra
milaza fa tsy manao fepetra an’izany ny firenena na vondron-tany hanampy na
hamatsy vola an’i Madagasikara.
Amin’izao anefa, vokatry ny fifanolanana politika tamin’ny 2002 dia Malagasy
maro no tery, tsy afaka ho olom-pirenena miaina malalaka satria tsy nahavitra ny
Lalàna fanafoanan-keloka ka tokony navoakany ny Antenimieram-pirenena (Loi d’amnistie).
Ilaina ny fanafoanan-keloka mba tsy hovoatery hihenjana vao afa-mipoitra ireo
tsy niray hevitra amin’ny Fitondrana. Sorohana ny fifandranitana sy ny kakay
politika tsy ho tarazo taona maro lovan-taranaka.
Noho izany : Disoin’ny MFM Ivon’Imerina ny fomba fitondrana mamoritra, manao
"tsindrio fa lavo" sy mamery zo ny olona tsy mitovy hevitra amin’ny
Mpitondra na resy tamin’ny fifidianana. Mampifanandrina sy mampiromoromo ny
mpiray firenena izany ary mampihemotra ny famatsiam-bola sy fampiasam-bola
tokony ho amin’ny fampandrosoana.
Momba an’i Fianarantsoa dia manaitra ny Mpiray firenena ny MFM amin’ny
fomban’ny Governemanta hendrantrendratra mandrehitra fifandrafiana.
Olana azo vahana eo amin’ny Direseb na DRH tahaka ny famindran-toerana rehetra
ny an’ny Provizera ao Fianarantsoa. Kanefa ny Governemanta no miara-mioko amin’ireo
mpisolelaka politika resy tamin’ny fifidianana ka manararaotra manao valifaty
amin’ny vahoaka any an-toerana. Toa izany ny fampidirana hery mitam-piadiana
avy aty ivelany fa tsy matoky ny mpitandro ny filaminana any an-toerana.
Fitondra tany miady, fisokerana sy fisakanan-dàlana ny miditra sy mivoaka ny
renivohitr’i Betsileo, famoronana heloka sy fisamborana an’ireo naharesy
tosika ny mpila handitra tany an-toerana. Mpitondra tapi-dàlan-kaleha no
mamoritra aman-kery tahaka izany.
Eo anatrehan’izany dia samy mitatitra ny mpikambana MFM fa manakivy ny mponina
ary mamosavy ny fitokisan’ny vahoaka eto anivon’Imerina ny mpitondra izay
nofidiny izao paipaika itondran’ny Governemanta olom-boatendry ny
raharaham-pirenena izao.
Ny fandaminana ara-penitra ny ambaratongan’ny MFM anatin’ny faritra
Mitana hatrany ny finiavany hanainga ny fampandrosoana avy amin’ny Faritra
(Région) ny MFM Ivon’Imerina. Ain-dehibe amin’izany ny famatsiam-bola. Koa
manainga ny mpikambana ny MFM Ivon’Imerina handray andraikitra hampiadihevitra
sy henetsiketsika ny vahoaka momba ny fitondrana ny Firenena sy ny faritra.
Nifametrahan’ny mpivory ny toro-marika hanatsarana ny fenitra andaminana ny
MFM momba ny mpikambana, ny vondrona MFM isaky ny fivondronana, ny faritra MFM
ary koa ny vovonana.
Tati-baovao
Ny MFM anatrehan’ny fomba fitondrana ankehitriny
Antananarivo, 2 marsa 2004
MFM Faritra Ivon’Imerina
Ny Mpiandraikitra
Jean Constant Raveloson
05/03/2004