Pety Rakotoniaina : « Tsy mpikaraman’adin-dRavalomanana aho »
Tamin’ny faha 18 ny volana may teo no tonga nametraka ny fikambanana
« Tambatr’i Madagasikara » tany amin’ny renivohitry ny
distrikan’Ambatofinanadrahana i Pety Rakotoniaina, izay filoha
nasionalin’ity fikambanana ity.
Nahavory olona marobe tokoa izy tamin’izany fotoana izany, satria dia
manodidina ny 2 000 eo ho eo no ireo tonga nanatrika azy.
Mbola azo lazaina aza fa tokony ho maro noho izany ny vahoaka tokony ho tonga
tamin’ity fananganana ity fikambanana ity raha tsy nisy ny sakantsakana sy ny
tetika maro nataon’ny mpitondra fanjakana any Amoron’i Mania sy ny
olom-boafidin’ny Tim, izay mitondra amin’izao fotoana izao, mba tsy
hahatanteraka ny fivoriana.
Tsy nomena toerana hivoriana tao Ambatofinandrahana aloha ingahy Pety, satria
hono tsy azo anaovana fivoriana pôlitika ny toerana an’ny fanjakana toa ny
tranom-pokonolona, ny toerana filalaovana baolina, ary ny tsena sy ny toerana
malalaka hafa. Ny dikan’izany dia tsy misy ny toerana izay azo anaovana
fivoriana amin’ny distrika toa itony. Tany amin’ny sekoly tsy miankina indray no
noheverina fa hanaovana izany nefa toa efa nahazo fampitandremana mialoha koa
ireo sekoly ireo mba tsy handray azy, io fotoana io moa andro fianarana rahateo
koa dia mora hoan’ireo sekoly ireo no nanda ny fangatahana.
Efa saika tsy raikitra ny fivoriana nataon’i Pety Rakotoniaina raha tsy nisy ny
toerana iray izay kianja manokana an’ ny mpikarakara tanora ao an-toerana. Hita
nanaraka ny fihetsiketsehana koa moa ny lehiben’ny Faritra Amoron’i Mania izay,
nihaodihaody tao amin’iny faritra iny nandritra ny fanomanan’ny Tambatra ity
fihaonana ity.
Araka ny voalaza koa, hoy ireo mpikambana ao Ambondromisotra, izay nametran’ny
fikambanana tany an-toerana, dia nahazo fandrahonana ihany koa ny ben’ny tanàna
sy ny mpikarakara tany an-toerana raha manantanteraka ny fivoriana. Tsy
nahasakana ny fihaonana anefa izany fa vao mainka toa nahabetsaka ny olona ho
tonga, namaly ny antso.
Tamin’izany famoriam-bahoaka izany indrindra àry no nilazan’i Pety fa tsy
mpikaraman’adin-dRavalomanana mihitsy ny tenany. “Raha olony ve aho dia ho
sakanany toa izao ny fivoriana izay ataoko?”, hoy ihany izy nanohy ny teniny.
Nitsikera mafy ny zava-misy ankehitriny izy ary nanameloka an-dRavalomanana izay
nilaza fa nanao fototra kanefa dia izao fahantrana be izao no mahazo ny firenena..
“Na izaho aza dia nofitahany tamin’ny hoe homena ny “helicoptère” hoentina
hanenjehana dahalo, nefa rehefa tonga tamin’ny toerana izy dia tsy nisy izany.”
Tany Ambondromisotra aza izy dia nilaza mihitsy fa fandrika ny nanagadraina ny
solombavambahoaka Haja izany, izay olona isan’ny niady mafy ihany koa teo
amin’ny fametrahana azy teo amin’ny toerana. Raha mikasika ny raharaha pôlitika
misy amin’zao fotoana irao dia nilaza koa i Pety Rakotoniaina fa hisy ady eto
raha tsy milamina ny olana mikasika ny fifidianana io. Ary na inona na inona no
hitranga dia tsy hisy intsony ny “premier tour dia vita”. “Koa raha sanatria
misy ny hala-bato dia mitandrema ianareo Tim io fa hisy ady eto, ary ho
tompon’andraikitra amin’izany ianareo”, hoy ihany ity filohan’ny Tambatra.
Tokony hojerena koa ny momba ireo sesi-tany any ivelany sy ireo gadra pôlitika
fa tsy mety izao.
Ary dia nilaza koa Rakotoniaina Pety fa tsy tokony hitantana ny fifidianana
ny ministeran’ny ati-tany. Raha nanontaniana ny mety hilatsahany izy dia
nilaza fa mbola tsy fotoanany izao.
Jesy Belaolao
Gdi 26-05-2006