Raharaha Lycée Raherivelo Ramamonjy
Tafaverina aty Fianarantsoa ireo nalefa tany Tsiafahy
Anisan'ny raharaha iray nanavesatra ny rivotra pôlitika teto
Fianarantsoa hatramin'ny fiafaran'ny taona 2003 ka mandraka ankehitriny ny
disadisa nisy tao amin'ny Lycée Raherivelo Ramamonjy izay noho ny fanoloana
tomponandraikitra tampotampoka sy tsy nazava ka niteraka savorovoro. Nisy
mihitsy moa ny fifandonana teo amin'ny ireo tsy nankasitraka izany sy ny
mpitandro ny filaminana tamin'ny 16 febroary 2004 sy ny fahasimban-javatra teny
amin'ny Biraon'ny Talen'ny fampianarana teny Mahamanina ny ampitson'io koa dia
nisy ny fisamborana nanomboka hatreo.
Raha hotsiahivina aza dia mpitandro ny filaminana avy any Antananarivo izay nisy
misaron-tava no nameno ny Renivohitr'i Betsileo tamin'izany nanaovana ny
fisamborana izany. Ary tamin'ireo olona nosamborina, izay nahitana
mpanolo-tsaina ny tanàna sy mpampianatra avy ao amin'ny lycée Raherivelo
Ramamonjy sy ingahy François Randriamanankoavy mpanao gazetin'ny Radio Sava ary
koa olona vitsivitsy hafa, dia nisy enin-dahy tamin'ireo nalefa tany Tsiafahy
tamin'izany fotoana izany fa ny sasany notazonina teto Fianarantsoa ihany.
Hatramin'izao anefa dia mbola tsy nisy ny fitsarana, na ny famoahana azy ireo
madiodio fa dia tany am-ponja tany izy rehetra. Tsy hadino anefa ny momba azy fa
dia voaresaka hatrany isaka ny misy fivoriam-bahoaka. Eny fa na tamin'ireny
nandalovan'ny Filoha Marc Ravalomanana taty Fianarantsoa vao tsy ela ireny aza.
Dia tahaka izany koa tamin'ny fandalovan'Atoa Manandafy Rakotonirina nanatrika
ny Filankevitry ny Vondrona M.F.M tamin'ny sabotsy 10 jolay teo ireny.
Tamin'izany no nilaza Atoa Manandafy fa hisy fijerena amin'izay ny momba
an'ireny olona ireny izay marihina fa ny Tambatr'i Fianarantsoa daholo no
fikambanana misy azy ireo. Koa dia heverina fa ao anatin'izany ho fanafainganana
amin'izay ny fandinihana ny momba azy ireo izany ny fiverenan'ireo izay tany
Tsiafahy tamin'ny alin'ny alakamisy mifoha zoma 16 jolay izao.
Raha ny heno moa dia efa eo am-pikarakarana ny ho fiarovana ny mpisolovava azy
ireo. Ny lehiben'ny fampanoavana kao moa vao voatendry vao tsy ela ka dia
antenaina fa ho voavaha ato ho ato ity raharaha iray nanorisory ny sain'ny
mponina ity.
H.R.
Gdi 17/07/04