Tambatra-Pety Rakotoniaina : « Mbola tsy fotoana
filazana na ho kandidà na tsia izao »
04-05-2006 / 11:07
Afaka 10 andro dia henika ny Tambatra i Toliara ary ny hanerana an’i Madagasikara iraimanontolo no tanjona, hoy ny Filoha mpanorina an’io fikambanana io Ing Pety Rakotoniaina.
Tsy misy faritany tsy misy Tambatra intsony, hoy izy, amin’izao fotoana izao
ary ho an’izay mbola tsy henika izany dia efa mitsangana ny tompon’andraikitra
hitarika ny fikambanana. Raha tsahivina dia ny faritra avaratry ny Nosy no
nandalovan’ny mpitarika ny fikambanana mialohan’ny Toliara. Nomarihin’ny Ben’ny
tanànan’i Fianarantsoa fa lasa aloha loatra raha izao ny filazana fa ho kandidà
na tsia ny tenany na ny hoe hanolotra olona ho fidiana Filoham-pirenena ny
Tambatra. Na ny datin’ny fifidianana aza, hoy izy, mbola tsy fantatra ka ahoana
no ilazana sahady na ho isan’ny mpifaninana na tsia ? Notsahivin’Ing Pety
Rakotoniaina fa sehatra hamondronana ny vahoaka hanitsiana ny fomba fanao tsy
nety teo amin’ny fitantanana ny firenena ny fikambanana tarihiny. Mazava fa
mifantoka amin’izay fomba fijery izay ny kabary pôlitika ataon’ny Filohany
mandritra ny fitsidiham-paritra.
V. R.
©Gazetiko